سيد الغيد ( زايد بن كروز و محمد بن سعيدان ) حصرياً

بعد السفر وين انت ياسيد الغيد=ماهيب لك سنه تحجب التهاني
وين انت في عيني على شوفتك عيد=وصلت والشوق القديم ايحداني
منتل..والتله على الخطوه ابعيد=الله ياشي(ن)من البعد جاني
احس كني لك رسمت المواعيد=وكن اللي بقلبك يقوله لساني
وكني احدد لك من الشوق تحديد=في زحمة الانظار خلك وزاني
والى توارت ضمني يااتلع الجيد=كما تضم القلب عوج المحاني
لكن وصلت..ولابلغت المقاصيد=وذكرت من هو عن غرامك نهاني
شفت الاحبه ضمت الايد بالايد=وانا بجاكيتي وقفت بمكاني
وقلبت طاروق المحبه تناهيد=وقررت والنسيان للي نساني
الليل ظلمى والمساري سراميد=لكن مادون الرفاع البياني
العز..والشيمه..وثالثهم الجيد=ماجات راس اللي يحب الطماني
وانا معودني على العز تعويد=ابو راعي الطيب هيف السماني
وانا وربي عن وصاياه ماحيد=واوصي بها نفسي ووصي اخواني
وانت استلم مني صدوق التواكيد=وعلم بها اللي علموك اتعصاني
اسحب على الفرقا طويل الزغاريد=وارحل رحيل اللي حداه الزماني
قد قلتها في سد نفسي تراديد=ماتبلغ الغايات كل الاماني
لو يعرف الضميان درب المواريد=ماكان دب الياس قلبك الضماني